Visheshan विशेषण

             नामाबद्दल जो शब्द विशेष किंवा अधिक माहिती सांगतो आणि नामाची व्याप्ती मर्यादित करतो, अशा विकारी शब्दास "विशेषण" असे म्हणतात.
            ज्या नामाबद्दलची माहिती सांगितलेली असते, त्याला "विशेष्य " म्हणतात.

: विशेषणाचे प्रकार :

गुणविशेषण : जो शब्द नामाचा गुण किंवा विशेष दाखवितो, त्यास "गुण विशेषण" असे म्हणतात.

गुण विशेषण नेहमी त्याच्या विशेष्याच्या अगोदर येते.
उदा: सुंदर मुलगी, चतुर मुलगा

संख्या विशेषण : ज्या विशेषणाच्या योगाने नामाची संख्या दाखविली जाते, त्या विकारी शब्दाला "संख्या विशेषण" असे म्हणतात.

संख्या विशेषणाचे प्रकार :

१. गणनावाचक संख्या विशेषण : ज्या विशेषणाचा उपयोग गणना किंवा मोजण्यासाठी केला जातो.
उदा: दहा भाषा , चाळीस मुले

२. क्रम वाचक संख्या विशेषण: ज्या विशेषणाचा उपयोग वस्तूंचा क्रम दाखविण्यासाठी केला जातो.
उदा: दुसरा बंगला, पहिले दुकान,

३. आवृत्ती वाचक संख्या विशेषण: ज्या विशेषणाचा उपयोग "किती वेळा" याचा बोध करण्यासाठी केला जातो.
उदा: दहापट रक्कम, चौपदरी घडी

४. पृथकत्ववाचक संख्या विशेषण: ज्या विशेषणाचा उपयोग वेगळेपणाचा बोध करण्यासाठी केला जातो.
उदा: एकेक विद्यार्थी, दहा-दहाची तुकडी


विधी विशेषण: विशेष्याच्या किंवा नामाच्या नंतर येणा-या विशेषणाला " विधी विशेषण" म्हणतात.

सार्वनामिक विशेषण: जी विशेषणे सर्नामांपासून तयार होऊन नामाबद्दल विशेष माहिती सांगतात त्यांना "सार्वनामिक विशेषण" म्हणतात.
उदा:  मी: माझा, माझी, माझे
        तू: तुझा, तुझी, तुझे